Það er ágætt að nýta tímann fram að námskeiðinu til að undirbúa barnið aðeins fyrir sundið og venja barnið aðeins við vatnið þegar það er í baði. Það getið þið gert með því að telja hátt og skýrt upp að þremur (1 2 3), þá er blásið létt framan í andlit/vit barnsins eða skvett nokkrum vatnsdropum á andlit þess. Við það dregur barnið andann og þá látið þið vatn leka framan í andlit barnsins frá enni og niður. Hægt er að nota þvottapoka eða svamp ef þið viljið. Einnig er alveg yndislegt að fara með barninu í bað.

Önnur góð æfing er að láta börnin vera á maganum af og til þegar þau eru að ,,leika sér" og oft er talað um 10 mín á dag fyrir hvern mánuð. Þ.e. 3 mánaða gamalt barn ætti að vera samtals 30 mínútur á dag á kvið til að styrkja hrygginn, bakið og hálsinn, 4 mánaða í 40 mín o.s.frv.

• Skiptiborð eru við innilaugina sem gott er að nýta til þess að klæða börnin í og úr.


• Þegar þið mætið í tíma veljið þið ykkur skiptiborð og gott að grípa einnig körfu til þess að geyma allt dótið og fötin í þannig að skiptiborðið sé autt að ofan fyrir þá sem koma í næsta hóp á eftir.


• Ef tveir foreldrar eða forráðamenn koma með barninu er ágætt að annar fari beint inn í klefann að græja sig en hinn komi inn að laug og klæði barnið. Ef báðir ætla ofan í getið þið svo skiptst á.


• Ef foreldri kemur eitt er best að taka barnið með sér inn í klefa í burðarstólnum og sturta sig/ klæða í sundföt og taka svo barnið með inn að innilaug og nýta skiptiborð til þess að klæða barnið.


• Eftir tímann er sturta við innilaugina sem gott er að nýta til þess að skola af barninu.


• Gefa má barninu að drekka í lauginni eða uppi á bakka hvenær sem er hvort sem það er brjóst eða peli.


• Myndatökur eru leyfðar, pössum bara að deila ekki myndum af öðrum en okkar eigin fjölskyldu án leyfis.


• Ruslafata er við inngang að innilaug, takið endilega með allt rusl af skiptiborðinu ykkar.

Í lok hvers námskeiðs hjá Ungbarnasundi Erlu er hægt að koma í myndatöku. Í boði eru þrenns konar myndir, köfunarmyndir, einstaklingsmyndir og fjölskyldumyndir (ekki í kafi). Myndatakan fer fram í sérstökum myndatökutíma sem er auglýstur á hverju námskeiði fyrir sig. Greitt er sérstaklega fyrir myndatökuna beint til ljósmyndara.

Eftir skráningu munu samskipti milli kennara og foreldra fara fram í gegnum smáforritið Abler. Þar merkið þið einnig við ykkur fyrir hvern tíma.